“Ne thjesht dhe vetëm jemi të përqëndruar tek puna. Këtë shikoj si armën tonë më të fortë të momentit ku edhe jemi dhe do të jemi.”
Këto janë fjalët e para të presidentit të devollinjve Spartak Meraku kur ekipi ka disa javë që është në një fazë përgatitjesh.
Tek ky ekip ka një ndryshim rrënjësor, duke filluar nga stafi dhe për më shumë sipas Spartak Merakut: “Kemi filluar të mendojmë ndryshe në bashkëpunim me klubin, me një filozofi që mbështetet tek futbollistë që duan të punojnë fort dhe kanë një disiplinë sportive. Tek ne çdo futbollist ka shanset e veta për të zënë formacionin.
Ne u japim të gjithëve mundësinë dhe kjo është kryesore. Ne presim që futbollistët dhe stafi drejtues të jenë me një ego sportive, grintë, dëshirë për lojë dhe në fund priten edhe rezultatet.”
Ndërkohë që siç edhe vetë Meraku e ka deklaruar ka ndryshime dhe janë afruar disa futbollistë nga ekipi i të rinjve të Skënderbeut si dhe të huaj, ku kanë gjetur edhe disa futbollistë vendalinj.
Spartak Meraku në lidhje me merkaton vazhdon: “Merkatoja nuk është e mbyllur, por besoj se pjesa dërrmuese e ekipit është si bërthamë. Natyrisht që këto ditë presim edhe dy futbollistë. Ata do të plotësojnë dy pika që ne mendojmë se na duhen në ekip.”
