24 maj 2024
Skënderbeu-Vllaznia 3-2
Shënues: Nikaj 11’, Liço 16’, Rashica 32’ / Mala 43’, Balaj 80’ (11-m)
Skënderbeu-Vllaznia është sfida e së shtunës në stadiumin “Skënderbeu”, një nga ndeshjet që vërtet pritet me mjaft interes edhe në qytetin juglindor dhe jo vetëm.
Hera e fundit kur janë përballur këto dy skuadra vjen edhe nëpërmjet fotos së mëposhtme, ku në “Air Albania” Skënderbeu në finale për vendet 3&4 e mposhti Vllazninë me shifrat 3-2.
Të gjithë e mbajnë mend 24 majin e këtij viti, ku Skënderbeu kryesonte 3-0 me tre gola në 32 minuta, ndërkohë që më pas Vllaznia do të shënonte një në pjesën e parë dhe një në pjesën e dytë.
Fitorja e Skënderbeut e renditi atë në vendin e tretë dhe Vllazninë në të katërtin, ndërkohë që këtë të shtunë do të ritakohen sërish, këtë herë në stadiumin “Skënderbeu” në ndeshjen e javës së 3-të të superligës.
Është nga ato ndeshje me “spec” pasi Skënderbeut i duhen pikët maksimale, ndërkohë që shkodranët janë më të qetë, pasi kanë katër pikë në dy ndeshje.
Shpresohet shumë që të përsëritet historia e ndeshjes së fundit, ndërkohë që Skënderbeu në këtë ndeshje do të luajë vetëm për tre pikë.
Janë javët e para dhe pas 1 pikë në dy ndeshje tashmë pikët për bardhekuqtë janë një domosdoshmëri. Ajo që mund të thuhet me bindje është se të shtunën ora 20:00 do të kemi një ndeshje më shumë se të luftuar në stadiumin juglindor.
