Sporti

Euro 2024 trajneri silvinjo kapiteni gjimshiti sfida ndaj spanjës vendimtare për ne japim më t

Kombëtarja shqiptare do të luajë mbrëmjen e së hënës ndaj Spanjës sfidën e tretë dhe të fundit të grupit B, në kuadër të finaleve të Kampionatit Europian 2024 që po mbahet në Gjermani.Një ndeshje mjaft e rëndësishme për kuqezinjtë e drejtuar nga trajneri Silvinjo, të cilët renditen të tretët në grupin B me vetëm një pikë dhe do të kërkojnë një rezultat pozitiv nesër ndaj iberikëve, për të kaluar në raundin tjetër.Në prag të këtij takimi që do të luhet në stadiumin “Dusseldorf Arena” në Gjermani, në ora 21:00, trajneri Silvinjo dhe kapiteni i skuadrës Berat Gjimshiti kanë dalë përpara mediave, ku kanë folur për gjendjen e ekipit, atmosferën dhe kanë treguar pritshmëritë që kanë për këtë sfidë, që e konsideruan si mjaft vendimtare për rrugëtimin e Shqipërisë në këto finale.Trajneri Silvinjo vlerësoi kundërshtarin duke e konsideruar edhe si një nga skuadrat favorite për të fituar Europianin, por theksoi se Shqipëria ka shanset e saj dhe nesër do të kërkojë maksimumin për të tentuar kualifikimin.Keni mundësi për t’u kualifikuar dhe për të bërë histori me Shqipërinë, çfarë do të thotë kjo gjë për ju?– Është emocionuese dhe për më tepër është një pyetje interesante. Është e rëndësishme për familjen time. Për mua është fantastike. Spanja është skuadër brilante, do të jetë një ditë që nuk do ta harroj. Kemi përfunduar në grupin e vdekjes dhe tani na jepet një mundësi shumë e madhe kundër një prej skuadrave më të mira në botë.Spanja mund të luajë me formacionin e dytë nesër ?-E dini më mirë se unë që Spanja e ka në ADN-në e saj zotërimin e topit, ka shumë cilësi në mesin e fushës. Ka diçka tjetër, lojtarë shumë të mirë në krahë. Ka disa lojtarë shumë të shpejtë në krahë dhe qendër. Kanë shumë cilësi edhe në mbrojtje, të lejojnë shumë pak hapësira, janë të organizuar. Ka fituar me Kroacinë dhe Italinë, ka fituar grupin, për ne do të jetë ndeshje shumë e vështirë. Edhe ne kemi lojtarë të mirë, mezi presim të luajmë kundër Spanjës.Keni ndjekur nga afër ndeshjen Spanjë – Itali– Kam shkuar me Zabaletën, diçka e planifikuar, një ditë pas ndeshjes sonë. I njohim të gjithë kundërshtarët tanë, është një skuadër që impresionon, ka lojtarë shumë të mirë. De la Fuente ka bërë një punë shumë të mirë, sulmon dhe mbrohet shumë mirë. Në kualifikuese ka humbur vetëm një ndeshje kundër Skocisë. Lojtarët e mi janë të guximshëm dhe do të japin gjithçka në këtë ndeshje të fundit. Çdo gjë mund të ndodhë gjatë 90 minutave, do të futemi në fushë për të bërë më të mirën.Keni kaluar në epërsi në dy ndeshjet e para, çfarë ju ka munguar për të fituar?– Është diçka e madhe të shënosh i pari. Ky është eventi i dytë i madh për Shqipërinë dhe lojtarët po përmirësohen. Ka të bëjë me përvojën dhe ballafaqimet në gara të mëdha dhe me skuadra të mëdha. Duhet të vazhdojmë të përmirësohemi, në menaxhimin e fazave të lojës. Nëse do të bëjmë perfomancën më të mirë, mund të arrijmë rezultatin e duhur.Ka mbetur vetëm një ndeshje në grupin e ferrit, a je i lumtur që po luftojmë për kualifikimin?– Jam i lumtur. Shumë njerëz para pesë muajsh kanë menduar se do të pësojmë katër ose pesë gola, e ndeshja e fundit s’do të kishte asnjë vlerë. Jam i lumtur për punën që kemi bërë. Jam i kënaqur me lojtarët e mi, kemi bërë çdo gjë që kemi mundur. Vazhdojmë të ëndërrojmë.A është ndeshja më e rëndësishme në karrirën tënde si trajner?– Jam ende i ri, është një ndeshje me shumë rëndësi dhe nuk do ta harroj. Luajmë kundër Spanjës së vendit të parë. Jam gjysmë spanjoll gjysmë brazilian. Nëse kjo është më e rëndësishme, situata mund ta bëjë të tillë. Pas barazimit me Kroacinë ishte ajo, ndoshta mund të bëhet kjo me Spanjën.Çfarë do të thotë për Shqipërinë të kualifikohet në raundin e 1/16-ave?– Kemi punuar me skuadrën Kombëtare me muaj të tërë. Kemi qenë në Tiranë dhe kemi parë përkushtim të madh dhe besim nga njerëzit që punojnë për këtë skuadër. Në Shqipëri ka 3 milionë shqiptarë por dhe 10 milionë në botë. Gjeneratat e tanishme po gëzojnë ndeshjet e Kombëtares në Europian. Po bëjmë punë shumë të mirë. Nëse kalojmë grupin është më mirë. Do jetë kënaqësi të luajmë në mesin e 16 skuadrave më të mira.Cilën skuadër konsideroni favorite për të fituar Europianin?– Nuk kam arritur të shoh shumë ndeshje. Kam parë Spanjën me Italinë, kemi punuar për orë të tëra, stërvitje, udhëtime. Spanjën e kam parë, por jo ndeshjet e tjera. Vetëm 10-15 minuta mes Holandës dhe Francës. Sigurisht, nëse do të duhet të them emra, Spanja sigurisht, Italian dhe Kroacia gjithashtu nëse kalojnë grupin.Shqipëria ka shanse për t’u kualifikuar edhe me një barazim, a do të futeni në fushë për një pikë?– Unë në karrierën time nuk kam parë një trajner që shkon në fushë për barazimin. Nëse ke një skuadër të mrekullueshme luan për të fituar, por varet nga çfarë ndodhë gjatë ndeshjes. Nëse duam të kalojmë, duhet të fitojmë. Është e vërtetë që mund të kalojmë me dy barazime, por duhet të luajmë për të fituar dhe të shohim se çfarë do të ndodhë në minutat e fundit.Spanja vjen me disa mungesa ndaj Shqipërisë– Ata janë një skuadër e mrekullueshme, edhe skuadra e dytë mund të luajë dhe të fitojë. Janë të motivuar, nuk mund të mendojmë se çfarë bën Spanja. Ata luajnë në nivel shumë të lartë, kushdo që është në fushë. Shpresoj të kemi një ndeshje të mrekullueshme, e dimë që gjithçka mund të ndodhë.I keni ndjekur ndeshjet e Copa America?– Nuk ka qenë e lehtë të vijmë këtu. Ka patur shumë punë, gola, lojëra të mira, ndeshje të vështira. Nuk kam pasur kohë të shoh as ndeshjet e Europianit dhe jo më Copa America. Nuk kam kohë.Nga “EURO 2016” në “EURO 2024” çfarë ka ndryshuar për Shqipërinë?– Nuk kam përmirësuar futbollin shqiptar. Kjo ka të bëjë me punën e madhe të lojtarëve. Kemi lojtarë shumë të mirë. Në fushë do të jenë 11 dhe ka shumë të mirë mes tyre. Ne kemi punuar shumë për të parë se çfarë mund të bëjnë lojtarët në fushën e lojës, në mënyrë që të bëjnë edhe më shumë, që të përmirësohemi dhe të përballemi me kundërshtarin. Kemi lojtarë shumë të mirë, ka të bëjë me forcën dhe dashurinë që kanë për vendin.Formacioni titullar i Shqipërisë ndaj Spanjës? – Ne e kemi gati formacionin, por ne kemi edhe një seancë stërvitore, do të shohim dhe do të vendosim. Do të tentojmë të shfrytëzojmë mundësitë tonë për të vazhduar përtej fazës së grupeve.Pezullimi i Mirlind Dakut nga Komisioni i UEFA-s? – Sikurse tha edhe Gjimshiti, jemi këtu për të luajtur futboll në një eveniment brilant, duhet të flasim për futboll. Nuk duam të shpenzojmë energji për diçka tjetër. Çfarëdo që ka vendosur UEFA është punë e saj.Kapiteni i Kombëtares shqiptare, Berat Gjimshiti në konferencën për shtyp tha se Spanja është një ekip shumë i fortë, por të gjithë djemtë janë gati për të dhënë më të mirën e për të marrë maksimumin nga kjo sfidë.Ndeshja ndaj Spanjës?– Spanja është një ekip shumë i fortë, por të gjithë çunat janë gati për këtë sfidë nesër. Gjëja më e rëndësishme është që jemi në garë dhe kemi mundësi ta kalojmë grupin dhe do bëjmë gjithçka mundemi që ta bezdisim Spanjën.Spanja me formacionin e dytë ndaj Shqipërisë?– Nuk ndikon aspak sepse edhe formacioni i dytë i Spanjës ka të njëjtin nivel si formacioni i parë. E dimë kë kemi përballë i njohim kundërshtarët. Nuk e mendojmë aspak që ata do luajnë me ekipin e dytë, por do e marrim sfidën po aq seriozisht siç do ishte po të luanin me ekipin e parë.Pezullimi i Dakut nga Komisioni i UEFA-s?– Duhet të fokusohemi në ndeshjen e nesërme. Daku ka bërë gabim dhe ka kërkuar falje. Ne do të kemi kundërshtar të vështirë nesër dhe vetëm për këtë do mendojmë.A është një mision i pamundur fitorja ndaj Spanjës?– Asgjë nuk është e pamundur në jetë, por sigurisht që është ndeshje e vështirë. Ne sigurisht që do të bëjmë maksimumin dhe do tentojmë që t’i shqetësojmë kundërshtarët.UEFA ka gjobitur sërish FSHF-në për shkak të tifozëve?– Jam këtu për të folur për çështjen e kualifikimit, këto janë gjëra për të cilat përkujdeset UEFA. Arsyeja pse jemi këtu ka të bëjë me ndeshjen dhe për atë që do bëjmë nesër dhe do të bëjmë më të mirën.

Post Views: 9

Sporti

Konferenca për mediat / Trajneri Silvinjo shpjegon zgjedhjet e tij për sfidat e Nations League

Në prag të grumbullimit të Kombëtares shqiptare, që nis zyrtarisht të hënën e 6 tetorit, trajneri Silvinjo shpalli sot për mediat dhe opinionin publik edhe listën me 24 futbolllistët e thirrur për këto dy ndeshje, ku risi është mesfushori i Rijekës, Adrion Pajaziti.

Në konferencën zyrtare për media tekniku brazilian komentoi listën e lojtarëve të ftuar për ndeshjet ndaj Çekisë e Gjeorgjisë, foli për rikthimet e lojtarëve Muçi e Ajeti, pse mungon Rei Manaj, risinë “Adrion Pajaziti”, shpjegoi si është gjendja e kapitenit Gjimshiti ndërsa vlerësoi edhe dy kundërshtarët e muajit tetor.

Rikthimi i Muçit, Abrashi, Pajaziti dhe pse mungon Manaj – Kemi tre lojtarë të dëmtuar. Pas ndeshjeve të Kombëtares, Manaj është dëmtuar në një ndeshje me klubin e tij në Turqi dhe nuk ka luajtur më. Kemi folur edhe me lojtarin edhe me klubin dhe nuk kemi dashur që ta rrezikojmë. E njëjta gjë ndodh edhe me Medon Berishën dhe Keidi Baren. Medoni gjatë stërvitjes ka pasur probleme dhe nuk kemi rrezikuar as me të. Keidi Bare është dëmtuar me 8 shtator në sfidën kundër Elches dhe nuk ka luajtur më. Doktori i Kombëtares, Stessina ka qenë vazhdimisht në kontakt me mjekun e Zaragozës dhe lojtarit i duhet më shumë kohë për t’u rikuperuar. Sa i përket Pajazitit, është një lojtar që unë e njoh. Ka ndryshuar skuadër dhe po luan shumë mirë. Më pëlqen si luan, është rritur shumë si lojtar. Është një mesfushor që mund të luajë në shumë role. Sa i përket Abrashi, ai mund të japë ende shumë për Kombëtaren. Kemi shumë lojtarë të rinj në Kombëtare si Asllani, Mitaj, Muçi, të cilët kanë nevojë për futbollistët me eksperiencë si Gjimshiti, Ajeti, Abrashi të cilët e njohin mirë skuadrën dhe mund të nevojiten. Abrashi është një lojtar me të cilin mund të luaj. Kam besim te ky lojtar.

Pse nuk morët një tjetër sulmues qendre dhe a e konsideroni Albion Ademin? – Sa i përket lojtarit Tuci, e kam parë me Spartën e Pragës. Kam qenë edhe në qendren sportive të këtij klubi, e kam takuar. Është pjesë e listës dhe është njësoj si Çuni, si Vrioni që luan në Amerikë. Ne në staf kemi bërë zgjedhje. Kur nuk kemi lojtarë si Daku apo Manaj, që luajnë si sulmues qendrore kemi lojtarë të tjerë si Seferi apo Uzuni, mbase edhe Muçi që mund ta bëjë atë rol. Mua më pëlqen të luaj me një lojtar përpara, por ka shumë ekipe që nuk e kanë një 9-sh të qartë në ekipet e tyre. Futbolli është i tillë dhe duhet të përshtatemi. Deri tani kemi Dakun dhe Manajn që e bëjnë atë rol dhe kemi 2-3 lojtarë që i gjejmë dhe jemi pas tyre për t’i provuar. Në rastin e Asanit, Laçi është lojtari që është përshtatur më shumë deri tani në rolin e tij. Unë besoj në mundësitë që i jepen lojtarëve dhe jo në eksperimente. Zeka dhe Spahiu për shembull janë dy lojtarë që u është dhënë mundësia të jenë pjesë e Kombëtares dhe mund të rikthehen sërish me Kombëtaren pasi dera është e hapur. Deri para 3 muajsh zëvendësuesi i Asanit ishte teknikisht Muçolli. Por ne si staf do duhet të jemi pas lojtarëve të tjerë që mund të na shërbejnë. Lojtarët shikohen në stërvitje jo vetëm gjatë ndeshjeve. Kombëtarja është e hapur dhe mund të ketë hapësirë për t’u rikthyer. Albion Ademi? – Sipas nesh nuk është ende momenti i këtij lojtari.

A është tani momenti i Muçit? – Që unë të marr 2-3 lojtarë, sigurisht që do të më duhet të lë ndonjë lojtar tjetër jashtë. Në këtë rast kemi rikthimin e Muçit që është një lojtar shumë i rëndësishëm për ne. Është i ri dhe ka një rrugë të bukur përpara. Por duhet të kuptoni që kur një lojtar ndryshon klubin, ka një lloj ndryshim edhe në jetë. Ka nevojë për kohë për t’u përshtatur. Fjala që unë zgjedh në këtë rast është ‘durim’. Ai po bën mirë, mund të ketë mundësi dhe minuta edhe me ekipin. Nga 24 lojtarë që ne përzgjedhim, secili lojtar ka mundësinë e tij për të luajtur. Qoftë 10 apo 90 minuta, është një mundësi shumë e madhe për lojtarin, pasi mund t’i ndryshojë jetën. Por edhe stërvitja, jo vetëm ndeshje. Duhet të kujtojmë që lojtarët do të luajnë në fundjavë me klubet e tyre dhe do të bëjmë rivlerësimet tona se si do të jetë gjendja e tyre. Ju jeni të lumtur me Muçin dhe unë jam i lumtur me to dhe shpresoj të ketë një lloj vazhdimësie.

Grumbullimi i Spahiut & Zekës në ndeshjet e kaluara dhe rikthimi në Çeki – Sa i përket Zekës dhe Spahiut, grumbullimi i tyre nuk është një eksperiment. Kombëtarja të jep mundësi dhe ne kemi pasur mundësi që t’i shohim këta lojtarë për 10 ditë. Spahiu pati hapësirë të luajë disa minuta edhe me Gjeorgjinë. Të dy janë lojtarë që luajnë në të djathtë, por janë mëngjarashë. I dhamë hapësirën për të qenë pjesë e skuadrës. Ne kemi 45-50 lojtarë që i kemi vazhdimisht në monitorim. I kemi parë dhe Kombëtarja është e hapur për të gjithë. Sa i përket ndeshjes me Çekinë rikthehemi me 11 tetor në Pragë. Kemi dy ndeshje të vështira në transfertë. Çekia është një ekip i fortë, fiton centimetra. Luan teknikisht dhe ka 4-5 lojtarë me të cilët mund të luajë në ajër. Ka një tranzicion të shpejtë dhe ka lojtarë fizikë. Do jenë dy ndeshje të vështira dhe është një grup i vështirë.

Organizimi i Kampionatit Europian U-21 2027 – Është e vërtetë që FSHF është kandidate. Unë jam trajner, mua më intereson shumë lojtarët e U-21. Në fakt ne kemi marrë shumë nga aty, Simonin, Bajramin, Mitajn, Berishën, Pajazitin, Fetain, Shpendin. Kemi marrë shumë lojtarë të fortë aty, mua më intereson, por se si bëhet, ku bëhet pastaj, në vitin 2027, nuk është çështje e trajnerit. Unë jam i lumtur kur lojtari bën një rrugëtim të mirë, në një kampionat të fortë. Unë jam ai që duhet t’i shkojë mbrapa lojtarit, nuk është e trajnerit të vendosë apo të japë opinione, është një çështje e veçantë, që sipas meje nuk më përket. Nga ana sportive jam shumë i lumtur që lojtarët e U-21 vijnë te ne në kondicion të mirë.

Armando Broja, keni folur me klubin e Everton për gjendjen e tij? – Kemi folur pak me Evertonin, sipas klubit ka nevojë dhe për 5 javë të rikuperohet. Për momentin nuk është në gjendje të luajë me ekipin e tij, automatikisht nuk është i disponueshëm për ne. Kam pak për të thënë për këtë rast. Dëshira është të rikuperohet që të rikthehet. Sa më shumë lojtarët të luajnë me klubin, aq më mirë për ne. Është lojtar i rëndësishëm, ishte në Europian me ne. Presim që të rikthehet sa më shpejt.

Si është gjendja e lojtarëve që nuk kanë shumë minuta me klubet e tyre? – Jam shumë i lumtur me të gjithë. E rëndësishme të kuptohet se kemi në monitorim 40 – 50 lojtarë. Nuk jemi Kombëtare që nëse nuk luan me klubin, nuk përzgjidhesh. Të mos jesh pjesë e listës, nuk do të thotë që nuk stërvitesh. Nuk varet nga sa minuta luan. Gjithmonë lotjarët kanë qenë të gatshëm për të dhënë gjithçka. Ne duhet të bëjmë një listë të ekulibruar dhe të mirë. Unë jam shumë i kënaqur me lojtarët, pasi pavarësisht minutave kanë dhënë gjithçka me fanellën e Kombëtares. Luajnë apo jo në Champions, me minuta apo 0 minuta për mua është e rëndësishme të japin zemrën dhe shpirtin në fushë.

Gjendja e Berat Gjimshitit? – Kemi folur me doktorin e Atalantës. Stesina ka folur me ta, Gjimshiti është kapiteni i kësaj skuadre, lojtar i rëndësishëm për kombin. Një eksperiencë e bukur njerëzore dhe futbollistike. Nuk ishte në Euro 2016, pastaj u kthye ishte në Euro 2024 dhe ishte kapiten. Jeta është e bukur, jeta shkon para, jam i lumtur për të. Duhet të presim sot, nëse ftohet apo jo për ndeshjen e nesërme me Atalantën. Të shohim, ka një dëmtim të vogël. Për të tjerat flas me doktorin, si ne, edhe Atalanta, presin si do të shkojë sot lojtari. Nëse do të jetë nesër në gjendje, nëse do të jetë gati, do të vijë me ne, nëse nuk luan, do të flasim me ta dhe lojtarin dhe do të shohim se çfarë do të bëhet. Kjo është situata e tij sot.

Mitaj i vetëm në krahun e majtë? – Ne ndjekim shumë lojtarë, edhe majtas. Por mos harroni që Hysaj e Balliu kanë bërë shumë kohë mbrojtësin e majtë, edhe Balliu në dy ndeshjet e fundit ka bërë mbrojtësin e majtë. Ai është një lojtar me eksperiencë, luan me këmbën e kundërt. Hadroj ka bërë një rrugëtim në të kaluarën si mbrojtës i krahut të majtë, e ka eksperiencën. Ne duhet të kuptojmë çfarë të bëjmë në mbrojtje nëse ndodh ndonjë gjë me Marion, por sipas nesh të tre mund të bëjnë të majtin. E vërtetë, janë karakteristika të ndryshme, por nëse është e nevojshme duhet të kuptojmë dhe në bazë të karakteristikave të lojtarëve do të vendosim. Për ne të tre mund të luajnë në të majtë Hadroj, Hysaj dhe Balliu. Hadroj vjen dhe stërvitet te ne si i majtë. Të djathtën e bën lehtësisht, pastaj nëse ndodh, në ndeshje ne duhet të zgjedhim.

Kombëtarja shqiptare do të luajë dy ndeshjet e radhës në kompeticionin “Liga e Kombeve” ndaj Çekisë (“Epet Arena”, 11 tetor, ora 20:45) dhe Gjeorgjisë (“Mikheil Meskhi”, 14 tetor, ora 18:00). Kuqezinjtë do t’i zhvillojnë të dyja këto sfida në transfertë.

REDAKTUAR nga:

“KORÇA BOOM”

Post Views: 42

Sporti

Gvozdenoviç: Tani na duhen pikët. Kam besim që do t’ia dalim ndaj Egnatias

Një ditë përpara ndeshjes ndaj Egnatias trajneri i Skënderbeut, Ivan Gvozdenoviç ka dalë në konferencën për shtyp, teksa ka pohuat se nesër ka besim të madh që lojtarët e tij do të futen në fushë për të marrë maksimumin nga kjo ndeshje:

“Nuk kemi vazhdimësi deri tani, rezultate nuk kemi, të tjerat i kemi, por tani të rëndësishme janë pikët. Nuk kemi nevojë të luajmë bukur, nuk kemi nevojë të flasim shumë, kemi nevojë vetëm për pikët. Sepse ne në ndeshjen e fundit kundër Partizanit, Dinamos, Tiranës ishim 1-0 për ne, 2-1 për Tiranën. 1-1 kundër Dinamos, 2-1 për Dinamon. Përgjegjësia dhe besimi duhet të shkojë më mirë për ne”. tha ai.

Gvozdenoviç vlerësoi maksimalisht Egnatian, por tha se edhe rrogozhinasit po përballen me probleme deri tani. Në fund, tekniku i Skënderbeut, deklaroi se ka besim të madh se këtë herë ekipi do të rikthehet të fitorja.

“Egnatia skuadër e mirë, e fortë por kjo është situata. Edhe ata kanë probleme brenda pas dy humbje radhazi, është ndeshje shumë e fortë dhe e vështirë. Ne jemi gati, sot kemi stërvitjen e fundit, Juri dhe Tare filluan stërvitjen me grupin. Tani do shohim.

Çdo skuadër mendon për fitore, edhe Skënderbeu. 100% e sigurt është që do futim një skuadër për një besim pozitiv, pastaj si do dalim do flasim nesër më shumë. Do bëjmë lojë të fortë, do menaxhojmë situatën dhe do Zoti dalim me rezultat pozitiv”, – deklaroi Gvozdenovic.

REDAKTUAR nga:

“KORÇA BOOM”

Post Views: 118

Sporti

“Ujqër”! Nesër të gjitha rrugët na çojnë në Strofull!

Gjatë gjithë kësaj jave klubi “Skënderbeu” dhe jo vetëm kanë bërë thirrje që nesër të gjithë duhet të jenë prezentë në stadiumin “Skënderbeu” për ta mbështetur sa më shumë ekipin e tyre të zemrës që në këtë moment ka më shumë se kurrë nevojë për lojtarin e 12-të.

Në fakt përballë Egnatias me ndihmën e tifozërisë Skënderbeu ka shanse të mëdha që ta mposhtë dhe të rikthehet në rrugën e rezultateve pozitive.

Edhe pak momente më parë ka qenë sërish klubi “Skënderbeu” që u ka bërë thirrje të gjithëve që nesër të jenë prezentë në stadium, madje sa më të shumtë në numër.

Nëpërmjet një postimi është treguar se nesër ka vetëm një rrugë në qytetin juglindor dhe ajo është rruga që të çon në stadiumin “Skënderbeu” në orën 19:00 të mbrëmjes.

Postimi i KF Skënderbeut:

Nesër të gjitha rrugët na çojnë në Strofull!

Bashkë më të fortë!

Bashkë ia dalim!

REDAKTUAR nga:

“KORÇA BOOM”

Post Views: 39

Sporti

VOLEJ FEMRA+MESHKUJ/ Skënderbeu luan në dy transferta, priten 2 fitore

Kjo fundjavë do të jetë java e 4-t për volejbollin e femrave dhe të meshkujve të Skënderbeut, pra të dy ekipet do të zbresin në parket, por në transfertë.

Në këtë mënryë, Skënderbeu në volejboll për femra që në 3 javët e para ka 3 fitore do të luajë ditën e shtunë në datë 5 tetor në përballjen Barleti Volley-Skënderbeu. Pra, Skënderbeu do të luajë në transfertë dhe të shtunën ndeshja starton në orën 17:00. Të paktën në letër vajzat bardhekuqe duket se e kanë të fituar këtë ndeshje, por që do të kërkohet më e mira me lojë bindëse dhe me rezultat të pastër.

Ndërkohë që vajzat luajnë në transfertën e kryeqytetit, janë meshkujt e volejbollit të Skënderbeut që edhe ata do të luajnë jashtë fushe. Në të njëjtën orë si femrat dhe në të njëjtën ditë do të luajë edhe Skënderbeu i trajnerit Arben Prifti. Elbasani-Skënderbeu është ndeshja e javës së 4-t të superligës, ndërkohë që Skënderbeu në 3 javët e para ka 2 fitore dhe 1 humbje dhe renditet në vendin e dytë pas Partizanit. Një super skuadër ka bërë këtë sezon volejbolli i meshkujve dhe edhe të shtunën pritet fitorja e radhës.

Suksese të dyja skuadrave të volejbollit të Skënderbeut në këtë javë të katërt!

REDAKTUAR nga:

“KORÇA BOOM”

Post Views: 148

Sporti

Korçarët “fërkojnë” duart për ndeshjen e fundit të fazës në Ballsh

Edhe pse duket larg ndeshja e fundit që mbyll fazën e parë, ajo është afër dhe korçarët e mendojnë. Natyrisht këtë fundjavë do të jetë ndeshja e parafundit për ta me ekipin e Egnatias dhe e fundit me Bylisin.

Komisioni i Disiplinës e ka dënuar këtë ekip me dy ndeshje pa spektatorë dhe kjo gjë u shkon për shtat korçarëve që nuk do t’u duket si një ndeshje transferte. Pra, kundërshtari nuk do të ketë mbështetjen e tifozëve të vet dhe kjo është shumë pozitive dhe një shans dhe mundësi me shumë për të marrë pikë të plota.

Por natyrisht mund të thuhet që ndeshjet merren një nga një dhe kështu është, pasi gara është në vazhdimësi dhe shikohet e gjithë rruga që e pret ekipin.

REDAKTUAR nga:

“KORÇA BOOM”

Post Views: 235

Sporti

Nations League/ Publikohet lista për dy ndeshjet ndaj Çekisë dhe Gjeorgjisë

Kombëtarja shqiptare do të luajë dy ndeshjet e radhës në UEFA Nations League, ndaj Çekisë (11 tetor, “Epet Arena”, 20:45) dhe Gjeorgjisë (14 tetor, “Mikheil Meskhi Stadium”, 20:45).

Trajneri Silvinjo ka publikuar sot listën me 24 lojtarë të grumbulluar për dy ndeshjet në transfertë.

Në portë janë janë Thomas Strakosha, Elhan Kastrati dhe Alen Sherri. Në mbrojtje Elseid Hysaj, Ivan Balliu, Mario Mitaj, Andi Hadroj, Ardian Ismajli, Berat Gjimshiti, Arlind Ajeti, Marash Kumbulla dhe Enea Mihaj

Në mesfushë Ylber Ramadani, Kristjan Asllani, Amir Abrashi, Adrion Pajaziti, Qazim Laçi, Nedim Bajrami dhe Ernest Muçi.

Në sulm Jasir Asani, Taulant Seferi, Arbër Hoxha, Myrto Uzuni dhe Mirlind Daku.

Grumbullimi i lojtarëve do të nisë që të dielën në Tiranë me futbollistët që do të përfundojnë më herët impenjimet me skuadrat e tyre, ndërsa grupi i lojtarëve pritet të jetë i plotë të hënën më 7 tetor. Seancat stërvitore do të zhvillohen në “Shtëpinë e Futbollit”, ndërsa të enjten kuqezinjtë do të udhëtojnë drejt Çekisë.

REDAKTUAR nga:

“KORÇA BOOM”

Post Views: 70

Sporti

VOLEJ FEMRA/ Pogradeci-Teuta sot 17:00, hyrja falas për tifozët!

Sot starton java e 4-ër e kampionatit kombëtar në volejboll për femra, ndërkohë që një nga ndeshjet e sotme është në Pogradec, atje ku vendaset do të presin Teutën.

Pas humbjes së një javë më parë me Barleti Volley, vajzat pogradecare të rrjetës do të kërrkojnë ti rikthehen një orë e më parë fitores dhe sot është dita e duhur.

Pogradeci-Teuta është përballja e sotme e orës 17:00, ndërkohë që klubi liqenor u ka bërë thirrje sportdashësve që të mbushin shkallët e pallatit të sportit, aq më tepër që edhe hyrja do të jetë falas për të gjithë.

Një ndeshje emocionuese pritet kjo e sotmja, ndërkohë që Pogradeci është i destinuar ta fitojë këtë përballje.

Suksese Pogradecit sot dhe me fitore!

REDAKTUAR nga:

“KORÇA BOOM”

Post Views: 74

Sporti

STARTON sot java e 8-të me Dinamo-Laçi/ Nesër Skënderbeu-Egnatia

Java e 8-të e superligës starton sot dhe dita e 5 çifteve të kësaj jave erdhi. Janë 5 ndeshje emocionuese dhe që pritet të dhurojnë emocione, për vetë faktin e pozitave që kanë skuadrat dhe që duan që të mos lëshojnë pikë që në këtë fazë të parë.

Java e 8-të starton sot, pra të premten me ndeshjen e parë të javës dhe do të jetë ajo e orës 19:00 mes Dinamos së Ilir Dajës dhe Laçit që akoma nuk ka shijuar fitoren e parë në këtë superligë.

Më pas e shtuna e 5 tetorit (nesër) do të dhurojë dy takime, të dyja në orën 19:00 dhe që do të jetë edhe dita e Skënderbeut. Në kryeqytet Partizani do të presë Bylisin, një ndeshje e lehtë në letër, ndërkohë që po në të njëjtën orë luhet në stadiumin “Skënderbeu”. Korçarët presin në shtëpi Egnatian, kampionen në fuqi dhe pavarësisht vështirësisë do të kërkojnë vetëm fitoren për t’u rikthyer në ritmin e duhur.

Java e 8-të dhe e parafundit e fazës së parë mbyllet të dielën me dy ndeshjet e fundit po në orën 19:00. Teuta-Tirana dhe Vllaznia-Elbasani janë dy përballjet e tjera interesante dhe në këtë mënyrë kjo javë e 8-të starton nesër dhe mbyllët të dielën me 5 çifte një më interesante se tjetra.

JAVA E TETË E SUPERLIGËS

TË PREMTEN 4 TETOR 2024

ORA 19:00 DINAMO-LAÇI

TË SHTUNËN 5 TETOR 2024

ORA 19:00 PARTIZANI-BYLIS

ORA 19:00 SKËNDERBEU-EGNATIA

TË DIELËN 6 TETOR 2024

ORA 19:00 TEUTA-TIRANA

ORA 19:00 VLLAZNIA-ELBASANI

REDAKTUAR nga:

“KORÇA BOOM”

Post Views: 133

Super Liga

SKËNDERBEU/ Të dëmtuarit duket se nuk japin garanci

Duke ndjekur stërvitjen e ditës së sotme, një stërvitje që filloi në orën 17:00 është parë se ata futbollistë që ne kemi thënë se janë të dëmtuar, pra Merlim, Randi dhe Tare nuk kanë punuar përsëri me grupin.

Ata kanë punuar në mënyrë individuale sipas programit të përcaktuar nga stafi. Është kjo stërvitja e parafundit para ndeshjes dhe nuk ka më asnjë shpresë apo garanci se këta futbollistë mund të jenë që nga minuta e parë.

Kjo është më se e sigurt dhe kështu trajneri ka filluar të piketojë një formacion ndryshe, ku të paktën i mungojnë këta futbollistë.

Pra, edhe se mund t’ia dalë ndonjë prej tyre, por kjo nuk do të thotë se janë gati edhe për atë se nuk duhet të rrezikohet më shumë dhe nuk kanë gjendjen e duhur, pasi kanë pothuajse një javë që nuk kanë marrë ngarkesë me grupin.

REDAKTUAR nga:

“KORÇA BOOM”

Post Views: 177

Kategoria 2

MALIQI dënohet me 2 milion lek gjobë/ Lion Ndoci pezullohet me 2 ndeshje

Fitorja në javën e dytë të kategorisë së dytë për Maliqin 1-0 ndaj Luftëtarit dhe e para për sezonin i ka kushtuar shtrenjtë maliqarëve pasi për shkak të hedhjeve të sendeve në fushë dhe koreve fyese Komisioni i Disiplinës e ka dënuar me 200.000 (dyqind mijë) lekë gjobë.

Ndërkohë që sjellje josportive është dënuar edhe futbollisti Ndoci me dy ndeshje pezullim.

Ja dhe vendimi në dëm të maliqarëve:

KF Maliqi, për sjellje të gabuar të spektatorëve, duke përdorur kore fyese dhe duke hedhur sende në fushën e lojës, në bazë të neneve 17/2/b, 17/2/e dhe 17/2/h të KDE, dënohet me gjobë në masën 200.000 (dyqind mijë) lekë. Sipas nenit 76/1/b të KDE, gjoba të aplikohet në masën 20%.

Lojtari i KF Maliqi, Lion Ndoci, për sjellje josportive ndaj lojtarëve të ekipit kundërshtar, në bazë të nenit 14/1/b të KDE, dënohet me 2 (dy) ndeshje pezullim nga veprimtaritë.

REDAKTUAR nga:

“KORÇA BOOM”

Post Views: 136