Ndeshja e parë e superligës, ajo mes Skënderbeut dhe Elbasanit nuk është e largët, pasi tashmë është zyrtare që të dy skuadrat do të përballen të hënën e 19 gushtit në orën 20:00.
Me pak fjalë pas 5 ditësh starton rrugëtimin e vet Skënderbeu, skuadër që do të përballet qysh në ndeshjen e parë ndaj debutuesve në këtë superligë, Elbasanit, ekip që është ngjitur këtë sezon në ligën e të mëdhenjve të futbollit shqiptar.
Skënderbeu dhe Elbasani për shkak edhe të mungesës së gjatë të elbasanllinjve nuk kanë shumë përballje mes tyre në vitet e fundit, ndërkohë që sot po sjellim statistikat e dy dekadave të fundit.
Elbasani ka luajtur në 17 vite, pesë herë në stadiumin “Skënderbeu” në ndeshje zyrtare dhe ka arritur të fitojë vetëm 1 herë dhe kjo daton në vitin e largët 2007, në dhjetorin e atij viti.
Më 23 dhjetor të 2007 Skënderbeu do të mundej në shtëpi 0-1 nga Elbasani, ndërkohë qysh pas asaj date janë luajtur edhe 4 ndeshje të tjera, të gjitha të fituara nga Skënderbeu, teksa po i sjellim më poshtë për të gjithë ju miq të portalit tonë.
Kujtojmë që këto 5 ndeshje janë zyrtare, pasi Skënderbeu dhe Elbasani e mbajnë mend të gjithë verën e kaluar kur u përballën në stadiumin “Skënderbeu” në një ndeshje miqësore, që përfundoi në barazimin 2-2.
Pjesa e parë e miqësores së vjetshme do të mbyllej 2-0 për Skënderbeun me gola të Rashicës dhe Nikaj, ndërkohë që në pjesën e dytë Elbasani do të barazonte me dy gola të Ajazit.
Me pak fjalë të hënën e 18 gushtit do të shohim një ndeshje vërtet të fortë, teksa edhe Elbasani do të kërkojë të thyejë tersin, pasi ka 17 vite që nuk fiton në stadiumin “Skënderbeu”.
Në 17 vjet 5 ndeshjet zyrtare në stadiumin “Skënderbeu”
21.03.2015 Skënderbeu-Elbasani 5-1
Shënues: Toçi 13’ (aut), Martins 20’, Nimaga 67’, 71’, Latifi 82’/ Gava 24’
29.10.2014 Skënderbeu-Elbasani 1-0
Shënues: Olainka 51’
04.05.2011 Skënderbeu-Elbasani 1-0
Shënues: Muzaka 45’
23.12.2010 Skënderbeu-Elbasani 1-0
Shënues: Shkëmbi 68’
23.12.2007 Skënderbeu-Elbasani 0-1
Shënues: Karcev 50’
