Erdhi dita e startit të kampionatit të kategorisë së parë për edcionin e ri 2024-2025. Pikërisht sot në orën 17:00 në 6 stadiume të Shqipërisë do të startojë kampionati i ri i kategorisë së parë.
Mes 12 skuadrave të kësaj kategorie nga Prefektura e Korçës është Pogradeci, përfaqësues në këtë kategori, skuadër që u rikthye nga kategoria e dytë edicionin e kaluar dhe do të startojë sot me objektiva madhore.
Pogradeci e nis sot rrugëtimin e vet në shtëpi përballë Kastriotit, një ndeshje që do të startojë në orën 17:00 dhe do të luhet në stadiumin “Gjorgji Kyçyku”, stadium që pritet të jetë i tejmbushur.
Gjatë gjithë merkatos verore pogradecarët kanë afruar shumë lojtarë dhe kanë ngritur një skuadër të denjë për vendet e kreut, ndërkohë që trajneri Samuel Nikaj është optimist për skuadrën që do të drejtojë.
Formën e mirë të Pogradecit e treguan më së miri edhe ndeshjet miqësore, sidomos me ekipet e superligës, por sot është tjetër histori dhe fillon rrugëtimi zyrtar në kategorinë e parë.
Në Pogradec besojnë shumë që skuadra do t’ia dalë dhe tashmë nuk na mbetet gjë tjetër, veçse të bëjmë urimin: Rrugë të mbarë Pogradec!
Në kategorinë e parë kujtojmë që luajnë skuadra me shumë emër dhe histori, si, Flamurtari, Besa, Apolonia, Kukësi, Kastrioti, skuadra që kanë pretendimet e veta.
